Koordinering av helse- og omsorgstenester

Individuell plan beskriv korleis tenestene du treng skal virke saman slik at du får ei heilskapleg oppfølging.  Planen skal ta utgangspunkt i dine behov, ønskjer og mål.  Du er sjølv med på å utarbeide planen.  Du får tildelt ein koordinator som skal sikre framdrift i arbeidet med ein individuell plan.

Sentrale spørsmål:

• Kva er viktig for deg?
• Kva skal til for at du når måla dine?
• Kven skal bistå deg, når skal det gjerast og korleis?

Koordinator skal syte for nødvendig oppfølging, samordning av tenestetilbodet ditt og framdrift i planarbeidet.  Dersom du ikkje ønskjer å få utarbeidd ein individuell plan, kan du likevel få utnemnt ein koordinator, dersom du mottek helse- og omsorgstenester.

Dersom du har ønskje om kven som kan være koordinator, vil vi prøve å imøtekomme dette.  Koordinator skal, saman med deg, skildre dine ønskjer, behov og mål, og prioritere desse.

Barnekoordinator kan tildelast til familiar som har eller ventar barn med alvorleg sjukdom, skade eller funksjonsnedsetting, og som har behov for langvarige og samansette eller koordinerte helse- og omsorgstenester og andre velferdstenester.  Ein barnekoordinator skal syte for at tenestetilbodet blir heilskapleg og koordinert.  Rett til barnekoordinator gjeld fram til 18 år.

Ei barnekoordinatoroppgåve kan være:

• Å sørgje for at du og ditt barn får naudsynt informasjon og rettleiing om helse- og omsorgstilbod og andre velferdstenester.
• Å bidra til at hjelpeinstansane rundt deg og ditt barn samarbeider og sikrar god framdift i samarbeidet.
• Å sikre god informasjonsflyt mellom deg/ditt barn og hjelpeinstansar.
• Å leie ei samarbeidsgruppe og arbeidet med individuell plan.

Dersom du har ønskje om kven som skal være familien sin barnekoordinator, vil vi prøve å imøtekomme dette.

Dersom du allereie har tenester i kommunen, kan du be ein av dei som gir deg tenester om å få ein individuell plan/koordinator/barnekoordinator.

Du kan òg ta kontakt via omsorgstenestene , helsetenestene eller helsestasjonen.

Tenesta er gratis.

Hyllestad kommune ivaretek informasjonssikkerheit og personvern i tråd med reglane i personvernforordninga.

Les meir om korleis kommunen handterer personopplysningar.

Dersom du er usamd i det vedtaket du har fått, eller med oppfølginga du får frå den kommunale helsetenesta, har du høve til å klage.

Dersom du ikkje får innvilga den tenesta du søkjer om, vil du få ei grunngjeving for det.  I svaret frå kommunen får du òg informasjon om korleis du klagar og klagefristen.

• Helse- og omsorgstenestelova
• Pasient- og brukarrettigheitslova
• Forskrift om habilitering, rehabilitering og koordinator